എ.പി.ജെ. അബ്ദുൾ കലാം സാങ്കേതിക സർവകലാശാല പിഎച്ച്ഡി പ്രവേശനം 2026-27: വിവരങ്ങളും ഗവേഷണ കേന്ദ്രങ്ങളും

എ.പി.ജെ. അബ്ദുൾ കലാം സാങ്കേതിക സർവകലാശാല (KTU) 2026-27 അധ്യയന വർഷത്തേക്കുള്ള പിഎച്ച്ഡി പ്രവേശന വിജ്ഞാപനം പ്രസിദ്ധീകരിച്ചു. എഞ്ചിനീയറിംഗ്, ടെക്നോളജി, ആർക്കിടെക്ചർ, അപ്ലൈഡ് സയൻസസ്, മാത്തമാറ്റിക്സ്, മാനേജ്മെന്റ് എന്നീ വിഷയങ്ങളിലായി താൽപ്പര്യമുള്ള യോഗ്യരായ ഉദ്യോഗാർത്ഥികളിൽ നിന്ന് അപേക്ഷകൾ ക്ഷണിക്കുന്നു. ബന്ധപ്പെട്ട വിഷയങ്ങളിൽ കുറഞ്ഞത് 5.75 CGPA-യോടുകൂടിയ ബിരുദാനന്തര ബിരുദമോ, അല്ലെങ്കിൽ 7.75 CGPA-യോടുകൂടിയ എഞ്ചിനീയറിംഗ്/ആർക്കിടെക്ചർ ബിരുദമോ ഉള്ളവർക്ക് അപേക്ഷിക്കാം. ദേശീയതലത്തിലുള്ള യോഗ്യതാ പരീക്ഷകളുടെ സ്കോറുകൾ അല്ലെങ്കിൽ സർവകലാശാല നടത്തുന്ന പിഎച്ച്ഡി പ്രവേശന പരീക്ഷ, തുടർന്ന് നടക്കുന്ന അഭിമുഖം എന്നിവയുടെ അടിസ്ഥാനത്തിലായിരിക്കും തിരഞ്ഞെടുപ്പ്. അപേക്ഷകർ 2026 ജൂൺ 20-നകം app.ktu.edu.in എന്ന വെബ്സൈറ്റ് വഴി ഓൺലൈനായി അപേക്ഷ സമർപ്പിക്കേണ്ടതാണ്.

കേരളത്തിലെ സാങ്കേതിക വിദ്യാഭ്യാസ ഡയറക്ടറേറ്റിന്റെ (DTE) കീഴിലുള്ള വിവിധ സർക്കാർ, എയ്ഡഡ് എഞ്ചിനീയറിംഗ് കോളേജുകൾ കെടിയുവിനോട് അഫിലിയേറ്റ് ചെയ്ത അംഗീകൃത ഗവേഷണ കേന്ദ്രങ്ങളായി പ്രവർത്തിക്കുന്നു. കോളേജ് ഓഫ് എഞ്ചിനീയറിംഗ്, തിരുവനന്തപുരം (CET), ഗവൺമെന്റ് എഞ്ചിനീയറിംഗ് കോളേജ് (GEC) തൃശ്ശൂർ, രാജീവ് ഗാന്ധി ഇൻസ്റ്റിറ്റ്യൂട്ട് ഓഫ് ടെക്നോളജി (RIT) കോട്ടയം, കൂടാതെ കോഴിക്കോട്, കണ്ണൂർ, ഇടുക്കി, പാലക്കാട്, വയനാട് എന്നിവിടങ്ങളിലെ ഗവൺമെന്റ് എഞ്ചിനീയറിംഗ് കോളേജുകൾ എന്നിവ ഇതിൽ ഉൾപ്പെടുന്നു. ഈ കേന്ദ്രങ്ങളിൽ ഗവേഷണം ചെയ്യാൻ താല്പര്യമുള്ള വിദ്യാർത്ഥികൾ, തങ്ങളുടെ ഗവേഷണ വിഷയങ്ങൾ അതത് കോളേജുകളിൽ ലഭ്യമാണോ എന്നും അവിടെയുള്ള സൂപ്പർവൈസർമാരുടെ ലഭ്യതയെക്കുറിച്ചും മനസ്സിലാക്കുന്നതിനായി അതത് കോളേജുകളുടെ ഔദ്യോഗിക വെബ്സൈറ്റുകൾ സന്ദർശിക്കേണ്ടതാണ്.

സാങ്കേതിക വിദ്യാഭ്യാസ വകുപ്പ് - ആമുഖം

സാങ്കേതിക വിദ്യാഭ്യാസ വകുപ്പ് ആസ്ഥാന കാര്യാലയം സംസ്ഥാനത്തെ സാങ്കേതിക വിദ്യാഭ്യാസ സംബന്ധിയായ എല്ലാ പ്രവര്‍ത്തനങ്ങളും കൈകാര്യം ചെയ്യുന്നു. നിലവില്‍, 12 എഞ്ചിനീയറിംഗ് കോളേജുകള്‍ (9 സര്‍ക്കാര്‍ എഞ്ചിനീയറിംഗ് കോളേജുകളും 3 എയിഡഡ് എഞ്ചിനീയറിംഗ് കോളേജുകളും), 52 പോളിടെക്നിക് കോളേജുകള്‍ (46 സര്‍ക്കാര്‍ പോളിടെക്നിക് കോളേജുകളും 6 എയിഡഡ് പോളിടെക്നിക് കോളേജുകളും), 3 ഫൈന്‍ ആര്‍ട്സ് കോളേജുകള്‍, 39 ടെക്നിക്കല്‍ ഹൈസ്കൂളുകള്‍, 17 കൊമേഴ്സ്യല്‍ ഇന്‍സ്റ്റിറ്റ്യൂട്ടുകള്‍, 42 ഫാഷന്‍ ഡിസൈനിംഗ് ഇന്‍സ്റ്റിറ്റ്യൂട്ടുകള്‍ എന്നിവകളുടെ പ്രവര്‍ത്തന നിയന്ത്രണം നിര്‍വഹിക്കുന്നത് ഈ ആസ്ഥാന കാര്യാലയമാണ്. കൂടാതെ സര്‍ക്കാര്‍ മേഖലയിലും സ്വകാര്യ മേഖലയിലുമായുള്ള 150-ഓളം വരുന്ന എഞ്ചിനീയറിംഗ് കോളേജുകളുടെ പഠന സംബന്ധിയായ നിയന്ത്രണങ്ങളും ഈ ആസ്ഥാന കാര്യാലയം നിര്‍വഹിക്കുന്നുണ്ട്.

ഇൻഡസ്ട്രി ഓൺ ക്യാമ്പസ് (ഐ.ഓ.സി)

ഇന്നത്തെ വ്യവസായമേഖല പ്രത്യേക വൈദഗ്ധ്യമുള്ള ബിരുദധാരികളെ തിരയുന്നു. വ്യവസായ മേഖല, വ്യവസായത്തിന് അനുയോജ്യരായ ഉദ്യോഗാർത്ഥികളെ തിരഞ്ഞു എടുക്കാൻ താല്പര്യപെടുന്നു. ഇത്തരമൊരു സംസ്കാരം സുഗമമാക്കുന്നതിനും പരിപോഷിപ്പിക്കുന്നതിനും, വിദ്യാർത്ഥികൾ കാമ്പസിൽ ആയിരിക്കുമ്പോൾ തന്നെ വ്യവസായ സംസ്കാരവുമായി ഒരു എക്സ്പോഷർ നേടേണ്ടത് അത്യാവശ്യമാണ്. സംസ്ഥാനത്തുടനീളമുള്ള കോളേജുകൾ, വ്യവസായങ്ങളും അക്കാദമിക് സ്ഥാപനങ്ങളും തമ്മിലുള്ള സഹകരണം വളർത്തിയെടുക്കുകയും പരസ്പര പ്രയോജനകരമായ പങ്കാളിത്തം സൃഷ്ടിക്കുകയും ചെയ്യുന്നു. ഐഒസി പ്രവർത്തനങ്ങൾ പ്രോത്സാഹിപ്പിക്കുന്നതിനുള്ള ഉപകരണങ്ങൾ വാങ്ങുന്നതിന് സർക്കാർ ഭരണാനുമതിയും നൽകി.